ၶၢဝ်ႇမိူင်းတႆး
SSA/SSPP ၸတ်းပၢင်ၶုၵ်းထူပ်း ဝၼ်းလုၵ်ႉ ၽိုၼ်ႉ ၶွပ်ႈၶူပ်ႇ (54) ပီ
- Details
- Published Date
- Written by လႅင်ႇၶၢဝ်ႇ ပွတ်းႁွင်ႇ
ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSA/SSPP ၸတ်းပၢင်ၶုၵ်းထူပ်းဝၼ်းၵိူတ်ႇလၢႆးလုၵ်ႉၽိုၼ်ႉ ၶွပ်ႈၶူပ်ႇ(54)ပီ တီႈငဝ်ႈငုၼ်းဝၢၼ်ႈႁၢႆး မီးၽူႈယႂ်ႇၵူၼ်းလူင်လႄႈ ၵေႃႉသိုၵ်းၵေႃႉႁၢၼ် ၸဵမ်ပီႈၼွင်ႉ ၵူၼ်းမိူင်း ၶဝ်ႈႁူမ်ႈ 800 ပၢႆ။
ဝၼ်းထိ 21/05/2012 ပူၼ်ႉမႃးယၢမ်းၵၢင်ၼႂ် 6:00 မူင်းထိုင် 9:30: ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်း ၸိုင်ႈတႆး လႆႈၸတ်းပၢင်ၵႅဝ်ႈၶုၵ်းထူပ်းဝၼ်းၵိူတ်ႇလၢႆးလုၵ်ႉၽိုၼ်ႉၶွပ်ႈၶူပ်ႇ (54) ပီ တီႈငဝ်ႈငုၼ်း ဝၢၼ်ႈႁႆး မီးၽူႈယႂ်ႇၵူၼ်း လူင်တီႈငဝ်ႈငုၼ်း၊ ၵူၼ်းသိုၵ်းဢိၵ်ႇၵူၼ်းမိူင်း ၶဝ်ႈႁူမ်ႈ 800 ပၢႆ။
တီႈပၢင်ၵႅဝ်ႈၼႆႉ မီးမၢႆၶပ်ႉ တၵ်ႉယမ်ၸွမ်ပိဝ်ၸိုင်ႈတႆး၊ ၸွမ်ပိဝ်ပႃႇတီႇမႂ်ႇသုင်ၸိုင်ႈတႆး၊ ၸွမ်ပိဝ်တပ်ႉသိုၵ်း ၸိုင်ႈတႆး၊ ၼပ်ႉယမ်ၽူႈႁတ်းႁၢၼ်လုၵ်ႉၽိုၼ်ႉ ၸိူဝ်းလႆႈလူႇၼိူဝ်ႉလူႇလိူတ်ႈတႃႇၸိူဝ်ႉၸၢတ်ႈ ဝၢၼ်ႈမိူင်း မႃး။
ၸွမ်သိုၵ်းၸဝ်ႈသိူဝ်ထႅၼ်ႈ ၽူႈၼမ်းၼႃႈ(1) ပႃႇတီႇမႂ်ႇသုင်ၸိုင်ႈတႆး မွၵ်ႇလၢတ်ႈၶေႃႈၵႂၢမ်း ပိုတ်ႇၽုၺ်ႇ ပၢင်ၵႅဝ်ႈသေ ၶူၼ်ႉၶႆႈၼႄႁူဝ်ႁုပ်ႈပိုၼ်းလၢႆးလုၵ်ႉၽိုၼ်ႉလွင်ႈလႆႈယိပ်းၵွင်ႈၵၢင်ႇတေႃႇသူႈတႃႇၸိုင်ႈတႆး ဢၼ်တႄႇမႃးမိူဝ်ႈပီ 1958။ ၸွမ်ႁၢၼ် ၸဝ်ႈၶိူဝ်းတႆး ၵႅမ်ႁူဝ်ပဝ်ႈပႃႇတီႇမႂ်ႇသုင်ၸိုင်ႈတႆး မွၵ်ႇလၢတ်ႈၶေႃႈ ၵႂၢမ်းယွင်ႈယေႃးဢဝ်ၵုင်ႇမုၼ် သင်ႇၶႃႇၸဝ်ႈ၊ ပေႃႈမႄႈၵူၼ်းမိူင်းၸဵမ်ၼႂ်းမိူင်းၼွၵ်ႈမိူင်း ဢိၵ်ႇပႃးဢူၺ်းလီ ၵူႈမူႇၵူႈၸုမ်း ၸိူဝ်းၸွႆႈထႅမ်ပႃႇတီႇ မႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆးမႃး။
သိုပ်ႇသေၼၼ်ႉ ၸဝ်ႈသိုၵ်းလူင်ၶုၼ်သႅင် မွၵ်ႇလၢတ်ႈၶေႃႈၵႂၢမ်း ၶူၼ်ႉၶႆႈၼႄပိုၼ်ႉႁူႉပၢႆးႁၼ် ၵဵဝ်ႇလူၺ်ႈလွင်ႈသိုၵ်း လႄႈ လွင်ႈငမ်းယဵၼ်၊ လွင်ႈတွၼ်ႈသွၼ်လႄႈ လွင်ႈၸဵပ်းသၢင်ႈၸိုင်ႈတႆး မိူဝ်ႈပူၼ်ႉမႃး၊ လွင်ႈၵၢၼ်ပူၵ်းပွင်တွၼ်ႈ လိၼ်ႁုၼ်ႈမုၼ်းၶိုၼ်ႈယႂ်ႇ ဢၼ်တပ်ႉသိုၵ်းၸိုင်ႈတႆးၸွႆႈထႅမ် ပေႃႈမႄႈ ၵူၼ်းမိူင်းမႃး၊ လွင်ႈတေဢမ်ႇလႆႈလူင်လိုမ်း ၸိူဝ်ႉၸၢတ်ႈၸဝ်ႈၵဝ်ႇ ပေႃႈမႄႈၵူၼ်းမိူင်း ဢိၵ်ႇဢူၺ်းလီ ၸဵမ်ၸိူဝ်းၼႆႉ။
ၼွၵ်ႈသေၼၼ်ႉ ၼႂ်းပၢင်ၵႅဝ်ႈမီးပၢင်လူႇတၢၼ်းၸႅၵ်ႇဝၢၵ်ႈၵူႉသူဝ်ႇပၼ်ၵေႃႉသိုၵ်းၵေႃႉႁၢၼ် ၸိူဝ်းလႆႈလူႇၼိူဝ်ႉလူႇ လိူတ်ႈ တႃႇၸိူဝ်ႉၸၢတ်ႈဝၢၼ်ႈမိူင်းလႄႈ ၵၢပ်ႈသွမ်းၵၢပ်ႈပဵၼ်းသင်ႇၶႃႇၸဝ်ႈ တႃႇ(21)ဝတ်ႉ တီႈဝတ်ႉလူင်ဝၢၼ်ႈႁႆး ၵႂႃႇၼႆယဝ်ႉ။
ၼႂ်းဝၼ်းလုၵ်ႉၽိုၼ်ႉၵႅတ်ႇၶႄဢဝ်ၶိုၼ်းမိူင်းၸိုင်ႈတႆးၼႆႉ ငဝ်ႈငုၼ်းၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA လွႆတႆးလႅင်းၵေႃႈၸတ်းပၢင်ၶုၵ်းထူပ်းဝၼ်းလုၵ်ႉၽိုၼ်ႉၵႅတ်ႇၶႄ ဢဝ်ၶိုၼ်းမိူင်းမႃးၵူႈပီ။
ဝၼ်းလုၵ်ႉၽိုၼ်ႉၵႅတ်ႇၶႄဢဝ်ၶိုၼ်းမိူင်းၸိုင်ႈတႆးတႄႇမႃးမိူဝ်ႈဝၼ်းထိ 21/05/1958။ ယွၼ်ႉၸုမ်းသိုၵ်းမၢၼ်ႈ ဢမ်ႇ ႁဵတ်းၸွမ်းၶေႃႈလႆႈၸႂ်ပၢင်လူင် 1947 သေၶႂၢၵ်ႈမိူင်းမႃးလႄႈ ၸဝ်ႈၼွႆႉ ႁွင်ႉ သေႃးယၼ်ႇ တႃႉ ၶိူဝ်းၸဝ်ႈၶိူဝ်းၶုၼ်မိူင်း မၢဝ်းလူင် ဢွၼ်ဢဝ်ၵူၼ်း 31 ၵေႃႉၵွင်ႈ 7 လဝ်း ၵိၼ်ၼမ်ႉသတ်ႈၸႃႇ ၵၼ်တီႈ ၽင်ႇၶူင်းတီႈၼိုင်ႈယဝ်ႉ ပူၵ်းတင်ႈ တပ်ႉၼုမ်ႇသိုၵ်းႁၢၼ်တႆး ပိူဝ်ႈတႃႇဢဝ်ၶိုၼ်းၸိုင်ႈတႆး ၵႃႈဢမ်ႇလႆႈ ဢမ်ႇၸူးမႃး၊ မိူဝ်ႈလဵဝ်ၶွပ်ႈၶူပ်ႇ 54 ပီယဝ်ႉ။
