ၶၢဝ်ႇမိူင်းတႆး

ဝၼ်းလုၵ်ႉၽိုၼ်ႉ ၵႅတ်ႇၶႄ ဢဝ်ၶိုၼ်းၸိုင်ႈတႆး လွႆတႆးလႅင်း

ၼႂ်းဝၼ်းလုၵ်ႉၽိုၼ်ႉၵႅတ်ႇၶႄ ဢဝ်ၶိုၼ်းမိူင်းၸိုင်ႈတႆးၶွပ်ႈၶူပ်ႇ (54) ပီ 21/05/2012 ၼႆႉငဝ်ႈၸိုင်ႈၶွင်ႇသီႇဢဝ် ၶိုၼ်း ၸိုင်ႈတႆး/တပ်ႉသိုၵ်းၸိုင်ႈတႆး လွႆတႆးလႅင်း လႆႈၸတ်းပၢင်ပွႆးဝၼ်း လုၵ်ႉၽိုၼ်ႉၵႅတ်ႇၶႄဢဝ်ၶိုၼ်းမိူင်း၊ မီးပီႈ ၼွင်ႉတႆး လၢႆတီႈၶဝ်ႈႁူမ်ႈ။

ပၢင်ပွႆးဝၼ်းလုၵ်ႉၽိုၼ်ႉၵႅတ်ႇၶႄဢဝ်ၶိုၼ်းမိူင်းၸိုင်ႈတႆး ဢၼ်ၸတ်းတီႈငဝ်ႈၸိုင်ႈၶွင်ႇသီႇ ဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး လွႆတႆးလႅင်းပီၼႆႉလႆႈတႄႇမိူဝ်ႈဝၼ်းထိ 20-22/05/2012။ မီးၵႅမ်ႁူဝ်ပဝ်ႈ 1 ၸွမ်ႁၢၼ်ၸဝ်ႈ ၸၢႆးယီႈ၊ ၵႅမ်ႁူဝ်ပဝ်ႈ 2 ၸဝ်ႈသိုၵ်းလူင် ၶိူဝ်းငိုၼ်း လႄႈပေႃႈၶူးပၢႆးမိူင်း တီႈၵိူဝ်းၵုမ် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉ သိုၵ်းၸိုင်ႈ တႆး RCSS/SSA ၶဝ်ႈႁူမ်ႈ။

ၼႂ်းဝၼ်းထိ 20/05/2012 ၵၢင်ၶမ်ႈၼၼ်ႉ မီးပၢင်မူၼ်ႈသိူဝ်း၊ ဝၼ်းထိ 21/05/2012 ဝၼ်းၶွပ်ႈၶူပ်ႇ (54) ပီ လုၵ်ႉ ၽိုၼ်ႉၵႅတ်ႇၶႄဢဝ်ၶိုၼ်းမိူင်းၸိုင်ႈတႆး ၼၼ်ႉမီးလွင်ႈၼႄၽၢင်ႁၢင်ႈသိုၵ်းလႄႈလွင်ႈ သိုၵ်းမၢၼ်ႈပေႉၵိၼ်ၵူၼ်းမိူင်း ၵူၼ်းဝၢၼ်ႈၸဵမ်ၸိူဝ်းၼႆႉၵႂႃႇ။ ဝၢႆးၼၼ်ႉ ၸွမ်ႁၢၼ် ၸဝ်ႈၸၢႆးယီႈ မွၵ်ႇလၢတ်ႈၶေႃႈၵႂၢမ်း လွင်ႈပိုၼ်းပဵၼ်မႃးဝၼ်း လုၵ်ႉၽိုၼ်ႉၵႅတ်ႇ ၶႄဢဝ်ၶိုၼ်းမိူင်းၸိုင်ႈတႆး။

ၸွမ်ႁၢၼ် ၸဝ်ႈၸၢႆးယီႈ မွၵ်ႇလၢတ်ႈၶေႃႈၵႂၢမ်းၵဵဝ်ႇၵပ်းလွင်ႈလႆႈၸတ်းပၢင်ပွႆးဝၼ်းလုၵ်ႉၽိုၼ်ႉ ၵႅတ်ႇၶႄဢဝ်ၶိုၼ်း မိူင်းၸိုင်ႈတႆးဝႃႈ “ယိူင်းဢၢၼ်းႁဵတ်းသင်လႄႈၶႂ်ႈႁဵတ်းၼၼ်ႉ ၵွပ်ႈပိူဝ်ႈဝႃႈၶႂ်ႈႁႂ်ႈသိုၵ်းႁဝ်းတင်းသဵင်ႈ လႄႈ တင်းၵူၼ်း မိူင်းႁဝ်းတင်းသဵင်ႈ ၶႂ်ႈႁႂ်ႈၶုၵ်းၸႂ်လႆႈဢၼ်ႁဝ်းၶႃႈ လုၵ်ႉၽိုၼ်ႉယူႇၼႆႉ၊ ဢၼ်ႁဝ်းၶႃႈႁဵတ်းယူႇမၼ်းပႆႇထိုင်တီႈ ထိုင် တၢင်းၼႆယႃႇပေလိုမ်းၵႂႃႇမၼ်း၊ ပေႃးယဝ်ႉႁမ်ႉႁႂ်ႈၶုၵ်းၸႂ်လႆႈ သိုပ်ႇႁၢပ်ႇပုၼ်ႈၽွၼ်းတၢင်သိုၵ်းဢၼ်လႆႈလုသုမ်းၵႂႃႇ ၼႂ်းၼႃႈသိုၵ်း ၼႂ်းပၢင်တိုၵ်းၼၼ်ႉ” ၼႆယဝ်ႉ။

ဝၢႆးၼၼ်ႉၽူႈမီးပုၼ်ႈၽွၼ်းၶဝ်သိုပ်ႇ လူဢၢၼ်ႇၼႄလွင်ႈဢၼ်လွႆတႆးလႅင်းလႆႈၵႂႃႇႁူပ်ႉထူပ်းဢုပ်ႇဢူဝ်းၸုမ်းၶိုင် ပွင်လွင်ႈငမ်းယဵၼ်မၢၼ်ႈ ၸၼ်ႉၸိုင်ႈမိူင်းႁူမ်ႈတုမ် ပွၵ်ႈၵမ်း(2) တီႈၵဵင်းတုင်ၸိုင်ႈတႆး ပွတ်းဢွၵ်ႇၶူင်းသေ မီးၶေႃႈ တူၵ်းလူင်းၵၼ်တင်းမူတ်း 12 ၶေႃႈၼၼ်ႉယဝ်ႉ။

ၵၢင်ၶမ်ႈဝၼ်းထိ 21/05/2012 ၼၼ်ႉၵေႃႈမီးပၢင်မူၼ်ႈသိူဝ်းပၢၼ်မႂ်ႇ/ပၢၼ်ၵဝ်ႇ ၸၢတ်ႈသႅင်းတႆး ပျေႃႇမူၼ်ႈပၼ် ၼုမ်ႇသိုၵ်းႁၢၼ်ၶဝ်လႄႈ ၽူႈၶဝ်ႈႁူမ်ႈပၢင်ပွႆးၵႂႃႇ။ ႁူဝ်ၶမ်ႈဝၼ်းထိ 22/05/2012 ၼၼ်ႉၵေႃႈမီးပၢင်ၵိၼ်ၶဝ်ႈႁူမ်ႈၵၼ် တင်းၵႅမ်ႁူဝ်ပဝ်ႈ 1 ၸွမ်ႁၢၼ်ၸဝ်ႈၸၢႆးယီႈ လႄႈၵႅမ်ႁူဝ်ပဝ်ႈ 2 ၸဝ်ႈသိုၵ်းလူင်ၶိူဝ်း ဢိၵ်ႇတင်းသိုၵ်းႁၢၼ်ၶဝ်။

ဢိင်ၼိူဝ်ၽိုၼ်လိၵ်ႈ ပေႃႈၶူးပၢႆးမိူင်း တီႈၵိူဝ်းၵုမ် ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA သေ ဝၼ်းလုၵ်ႉၽိုၼ်ႉၵႅတ်ႇၶႄဢဝ်ၶိုၼ်းမိူင်းၸိုင်ႈတႆးၼႆႉ ၸဝ်ႈၼွႆႉ ႁွင်ႉၸဝ်ႈသေႃး ယၼ်ႇတ ၶိူဝ်းၸဝ်ႈၶိူဝ်းၶုၼ်ၼႂ်း ႁေႃလူင် မိူင်းမၢဝ်းလူင် ဢွၼ်ဢဝ်ၵူၼ်း 31 ၵေႃႉ ၵွင်ႈ 7 လဝ်း တိုၵ်းၼမ်ႉသတ်ႈၸႃႇ ၵၼ်တီႈႁူၺ်ႈသမၼ်း ၸမ် ႁူၺ်ႈၽႃလႅင် ၽင်ႇၶူင်းတီႈၼိုင်ႈ မိူဝ်ႈပီ 1958 လိူၼ်မေႊ ဝၼ်းထိ 21 သေ ၵေႃႇတင်ႈၸုမ်းၼုမ်ႇသိုၵ်းႁၢၼ်ၸိုင်ႈ တႆးမႃး ပိူဝ်ႈတႃႇၵႅတ်ႇၶႄဢဝ်ၶိုၼ်း မိူင်းၸိုင်ႈတႆးၵႃႈဢမ်ႇလႆႈဢမ်ႇၸူးၼႆယူႇယဝ်ႉ။