ၶၢဝ်ႇမိူင်းတႆး

ပၢင်ၵုမ်သိုဝ်ႇၶိုၵ်ႉတွၼ်း ဢေႊသျႃႊ ၸတ်းတီႈ ၵုင်းထဵပ်ႈ

ပၢင်ၵုမ်သိုဝ်ႇၶိုၵ်ႉတွၼ်း ဢေႊသျႃႊ (Asia Media Summit) ၸတ်းႁဵတ်းတီႈ ၵုင်းထဵပ်ႈ ၸိုင်ႈထႆး မီးၽူႈသိုဝ်ႇၶၢဝ်ႇ တူဝ်ႈလုမ်ႈၾႃႉ ၶိုၼ်ႈႁွတ်ႈၼမ်လၢႆ။

မိူဝ်ႈဝၼ်းထိ 29 May 2012 ႁူင်းပွႆႇႁၢင်ႈသဵင် Thai PBS လႄႈ ASID ပဵၼ်ၸဝ်ႈ တႃႇၼႃႉလူင် မၼ်းသေၸတ်း ႁဵတ်းပၢင်ၵုမ်သိုဝ်ႇၶိုၵ်ႉတွၼ်းဢေႊသျႃႊ (Asia Media Summit) တီႈႁူင်းလႅမ်း သူဝ်ႊလ်ၾီးၵႅၼ်လ် လၢတ်ႉၽၢဝ်း။ ၼႂ်းပၢင်ၵုမ်မီးတူဝ်တႅၼ်းၸိုင်ႈမိူင်း၊ ၸဝ်ႈလူင်းထုၼ်းလူင် လႄႈ ၽူႈသိုဝ်ႇၶၢဝ်ႇတူဝ်ႈလုမ်ႈၾႃႉ ၶိုၼ်ႈႁွတ်ႈၸဵမ် ဢေႊ သျႃႊ ပႃႊသီႊၽိၵ်ႊ၊ ဢၾိၵ၊ ယူႊရူပ်ႊ ဢမေႊရိၵၢၼ်ႊႁွင်ႇ ၸိူဝ်းၼႆႉ။ ၼႂ်းၼၼ်ႉ မိူင်းႁူမ်ႈတုမ်မိူင်းမၢၼ်ႈၵေႃႈမီး တူဝ်တႅၼ်းလႄႈ ၸုမ်းသိုဝ်ႇၶၢဝ်ႇ မႃးၶိုၼ်ႈႁွတ်ႈ လဵပ်ႈႁဵၼ်းၸွမ်း ။

ၼႂ်းပၢင်ၵုမ်ၸႂ်ႉၵႂၢမ်းဢင်းၵိတ်ႉ ပဵၼ်ၵၢင်၊ တွၼ်ႈတႃႇတၢင်ႇၸၢဝ်းၶိူဝ်း  ၸိူဝ်းလုၵ်ႉ တၢင်ႇတီႈ မႃးလႄႈ ဢၼ်ဢမ်ႇပွင်ႇ ၵႂၢမ်းဢင်းၵိတ်ႉၼၼ်ႉ မီးၽၢႆႇပႄၽႃႇသႃႇပၼ်ၵႂၢမ်း ထႆး လႄႈ ၵႂၢမ်းဢႃႊရၢပ်ႊ။ ၼႂ်းပၢင်ၵုမ် မီးတူဝ်တႅၼ်းၸိုင်ႈမိူင်း ၽႂ်မၼ်းလႄႈ ၸဝ်ႈငိုၼ်းထုၼ်းၶဝ် မႃး ၼႄၵုၼ်ႇၵႃႉယဝ်ႉသပ်းလႅင်းၼေ လွင်ႈၸုမ်းၶဝ်ပဵၼ်ၽႂ်လုၵ်ႉမႃးတီႈလႂ် လိူဝ်သေၼၼ်ႉ မီးပႃး ၸုမ်း ဢၼ်ၵဵဝ်ႇၵပ်း ၵၢၼ်ၶၢဝ်ႇ ထီးဝီး လႄႈၼင်လူင်ၸိူဝ်းၼႆႉ မႃးၼေၼွၵ်ႈႁွင်ႈ ပၢင်ၵုမ် ၸွမ်း။

ၼႂ်းပၢင်ၵုမ်လူင်ၼႆႉ ပၼ်ႊၶီႊမုၼ်ႊ ၽူႈပွင်ၵၢၼ်လူင်ၸၢတ်ႈၸိုင်ႈလုမ်ႈၾႃႉ UN ၾၢၵ်ႇၶေႃႈၵႂၢမ်း ထိုင်ဝႃႈ “ ၵဵဝ်ႇၵပ်း လိူင်ႈၵၢၼ်သိုဝ်ႇၶၢဝ်ႇၼႆႉၵမ်ႈၼမ် လႆႈထုၵ်ႇလူင်ပွင်ၸိုင်ႈၶဝ် လွၵ်ႇငိုတ်ႈဝႆႉ တင်းၼမ်သေႁဵတ်းႁႂ်ႈသိုဝ်ႇဢမ်ႇပဵၼ် ၵၢင်၊ ဢမ်ႇလႆႈဢွၵ်ႇလွတ်ႈလွတ်ႈလႅဝ်းလႅဝ်းၵေႃႈ မီးတင်းၼမ်။ တီႈတေႉမၼ်းၽူႈသိုဝ်ႇၶၢဝ်ႇထုၵ်ႇလႆႈပဵၼ်ၽူႈသိုဝ်ႇ ၶၢဝ်ႇလွတ်ႈလႅဝ်းလႄႈ ၶၢဝ်ႇတေလႆႈ ပဵၼ်ၵၢင်၊ ဢမ်ႇၸွမ်းၾၢႆႇလႂ် ၾၢႆႇၼိုင်ႈ” ၼႆယဝ်ႉ။

ၼႂ်းႁွင်ႈပၢင်ၵုမ်ၼၼ်ႉ မီးၽူႈလူင်ႉလႅၼ်ႇ လွင်ႈၵၢၼ်ၶၢဝ်ႇမႃး လၢတ်ႈသပ်းလႅင်း ၼႄလၢႆလၢႆႁူဝ် ၶေႃႈဢၼ်ၵဵဝ်ႇၵပ်း ၶၢဝ်ႇမိူၼ်ၼင်ႇ လွင်ႈပူၵ်းပွင်ၶၢဝ်ႇ လႄႈလွင်ႈဢမ်ႇထုၵ်ႇမႅၼ်ႈ၊ လွင်ႈဢၼ်ၼၢင်းယိင်းလႄႈလုၵ်ႈဢွၼ်ႇလႆႈထုၵ်ႇ တဵၵ်းတဵင်၊ ၸွင်ႇၶၢဝ်ႇပၼ်တၢင်းၸွႆႈထႅမ် တီႈၶဝ်ယဝ်ႉ ၼႆၸိူဝ်းၼႆႉ မီးႁူဝ်ၶေႃႈလူင် မၼ်းမႃးလၢတ်ႈၼေ သေပိုတ်ႇ ပၼ်တိုဝ်ႉတၢင်း ၵူၼ်းၶဝ်ႈႁူမ်ႈၶဝ်လႆႈထၢမ် ၵႂၢမ်းထၢမ်ပႃး။

ၶိၼ်ႇမွင်ႇထေး လၢႆးၵၢၼ်ငဝ်းႁၢင်ႈသဵင်မၢၼ်ႈ (MRTV 4) လၢတ်ႈဝႃႈ ယၢမ်းလဵဝ်မိူင်းႁူမ်ႈတုမ် မိူင်းမၢၼ်ႈၵေႃႈလႅၵ်ႈ လၢႆႈ ၶိုၼ်ႈမႃးယဝ်ႉ ၸွမ်းၼင်ႇဢၼ် ပိူၼ်ႈၶဝ်ႈၸႂ်ဝႃႈ သိုဝ်ႇၶၢဝ်ႇမိူင်းမၢၼ်ႈ ဢမ်ႇလွတ်ႈလႅဝ်း ၼႆၼၼ်ႉဢမ်ႇၸႂ်ႈလွင်ႈ တေႉမၼ်း၊ ၶၢဝ်ႇမိူင်းမၢၼ်ႈၵေႃႈမီးလွင်ႈလွတ်ႈလႅဝ်း သေ ၵူၼ်းၼုမ်ႇၵေႃႈမီးသုၼ်ႇ ၶဝ်ႈႁူမ်ႈၼမ်မႃးလိူဝ်ၵဝ်ႇမိူၼ် ၼင်ႇယၢမ်းလဵဝ် ဢၼ်ႁဵတ်းၵၢၼ် ၶၢဝ်ႇယူႇၼႂ်းမိူင်းမၢၼ်ႈ ပဵၼ်ၵူၼ်းၼုမ်ႇ ၵမ်ႈၼမ် ဝႃႈၼႆ။

ပၢင်ၵုမ်ဢၼ်ၼႆႉမီးထိုင်ဝၼ်းထိ 30/05/2012 တႃႇႁူဝ်ၶေႃႈ  ဢၼ်တေမႃးထႅင်ႈ ဝၼ်းၼိုင်ႈၼၼ်ႉတၢင်းၶၢဝ်ႇသိုဝ်ႇ ႁႅင်းၼုမ်ႇ တေသိုပ်ႇဢွၵ်ႇၶၢဝ်ႇပၼ် ပီႈၼွင်ႉႁဝ်းၶဝ်ထႅင်ႈ။