ၶၢဝ်ႇမိူင်းတႆး

မူႇၸုမ်းၵူၼ်းမိူင်းတႆးႁူမ်ႈပိုၼ်ၽၢဝ်ႇ ငဝ်းလၢႆး ၵၢၼ်မိူင်းလႄႈ ၶၵ်ႉတွၼ်ႈလွင်ႈငမ်း ယဵၼ် ၼႂ်းၸိုင်ႈတႆး

မူႇၸုမ်းတႆးလၢႆလၢႆၸုမ်းႁူမ်ႈၵၼ်ၸတ်း ပၢင်သပ်းလႅင်းၸႅင်ႈၶၢဝ်ႇ ၵဵဝ်ႇလူၺ်ႈငဝ်းလၢႆးၵၢၼ်မိူင်း လႄႈၶၵ်ႉတွၼ်ႈ လွင်ႈ ငမ်းယဵၼ်ၼႂ်းၸိုင်ႈတႆး ၼႂ်းၵဵင်းမႆႇ ၸိုင်ႈထႆးတီႈၼိုင်ႈမီးၽူႈသိုဝ်ႇၶၢဝ်ႇၶဝ်ႈႁူမ်ႈတင်းၼမ်။

မိူဝ်ႈဝၼ်းထိ 12/06/2012 ၼႆႉ မူႇၸုမ်းတႆးလၢႆလၢႆၸုမ်းႁူမ်ႈၵၼ်ၸတ်း ပၢင်သပ်းလႅင်းၸႅင်ႈၶၢဝ်ႇၵဵဝ်ႇလူၺ်ႈငဝ်း လၢႆးၵၢၼ်မိူင်း လႄႈၶၵ်ႉတွၼ်ႈလွင်ႈငမ်းယဵၼ်ၼႂ်းၸိုင်ႈတႆး တီႈ IC ၼႂ်းၵဵင်းမႆႇ ၸိုင်ႈထႆး မီးၽူႈသိုဝ်ႇၶၢဝ်ႇထႆး၊ တႆး၊ မၢၼ်ႈ၊ ၼွၵ်ႈမိူင်းလႄႈၽူႈၶဝ်ႈႁူမ်ႈတင်းမူတ်း 56 ၵေႃႉ ။

ယိင်းႁၢၼ်ၾႃႉ ၽူႈႁၢပ်ႇၵၢၼ်ၼႂ်းၸုမ်းၵပ်းသၢၼ်လွင်ႈၼၢင်းယိင်းတႆး လႄႈႁူမ်ႈၸတ်းပၢင်သပ်းလႅင်း ၸႅင်ႈၶၢဝ်ႇ ပွၵ်ႈၼႆႉ လၢတ်ႈဝႃႈ “ ဝၢႆးပၢင်လိူၵ်ႈတင်ႈ 2010 ယဝ်ႉပဵၵ်ႉသမ်ႉလၢတ်ႈဝႃႈမီးလွင်ႈ ၶိုၼ်ႈယႂ်ႇ လႄႈလွင်ႈလႅၵ်ႈလၢႆႈ ၼမ် မႃးၼႆသေတႃႉ တေႃႇထိုင်မိူဝ်ႈလဵဝ်လွင်ႈလႅၵ်ႈလၢႆႈၼႂ်းၸိုင်ႈတႆးၼႆႉ ပႆႇလႆႈႁၼ်သင်၊ ယွၼ်ႉၼၼ် မိူဝ်ႈပူၼ်ႉ မႃးၼႂ်းဝၼ်းထိ 4-5/06/2012 ႁဝ်းၶႃႈၸုမ်းၸိူဝ်းဢၼ်ႁဵတ်းၵၢၼ်တူင်ႇဝူင်းၵူၼ်းလၢႆမူႇလၢႆၸုမ်းလႄႈၸုမ်းၵူၼ်း ၼုမ်ႇၼႂ်းမိူင်းလႄႈၸုမ်းၸဝ်ႈႁႆႈၸဝ်ႈၼႃး ဢိၵ်ႇတင်း ၸုမ်းသင်ၶ တင်းမူတ်း မွၵ်ႈ 70 ၵေႃႉ ပၢႆၸင်ႇလႆႈမီးပၢင်ဢုပ်ႇ ဢူဝ်းၵၼ်၊ ၼႂ်းပၢင်ဢုပ်ႇဢူဝ်း ၼၼ်ႉလႆႈ ဢုပ်ႇပႃး လွင်ႈယၢပ်ႇၽိုတ်ႇၸဝ်ႈႁႆႈၸဝ်ႈၼႃး မိူၼ်ၼင်ႇဢၼ်ထုၵ်ႇသိမ်း ဢဝ်ပႅတ်ႈတိူၵ်ႇႁႆႈ လွၵ်းၼႃး လႄႈတီႈ လိၼ်ၸိူဝ်းၼႆႉ။ ဝၢႆးပၢင်ဢုပ်ႇဢူဝ်းယဝ်ႉႁဝ်းၶႃႈၸင်ႇလႆႈမီးၶေႃႈတူၵ်းလူင်း ၵၼ် 9 ၶေႃႈ” ဝႃႈၼႆ။

သိုပ်ႇလၢတ်ႈထႅင်ႈဝႃႈ ပေႃးတေမႃးတူၺ်းၶိုၼ်းဢဵၼ်ႁႅင်းသိုၵ်းမၢၼ်ႈၼႂ်းမိူင်းႁူမ်ႈတုမ်မၢၼ်ႈၸိုင် 4 ပုၼ်ႈ 1 ပုၼ်ႈ ၼႆႉ ပၵ်းသဝ်းဝႆႉ ၼႂ်းၸိုင်ႈတႆး။ မီးလွင်ႈတူၵ်းလူင်းၵိုတ်းယိုၼ်းၵၼ်ယဝ်ႉၼႆသေတႃႉ တိုၵ်ႉသိုပ်ႇမီးပၢင်တိုၵ်းၵၼ် ထႅင်ႈယူႇ။ လူင်းလႆးမိုဝ်းၵၼ်ဝႆႉ တႃႇတေၵေႃႇသၢင်ႈလွင်ႈငမ်းယဵၼ်လႆႈ ၼႆသေတႃႉၵေႃႈပႆႇၼႄၼမ်ႉၼႄတူဝ် မၼ်းလႆႈၼႆ။

ၼႂ်းၶေႃႈပိုၼ်ၽၢဝ်ႇလၢတ်ႈပႃးဝႆႉဝႃႈ ပၼ်ႁႃၵၢၼ်မိူင်းဢၼ်ပဵၼ်ယူႇၼႆႉ ႁဵတ်းႁႂ်ႈမီးၽွၼ်းၸႃႉတေႃႇပၢႆးမၢၵ်ႈမီးၼႂ်း မိူင်းတႆးပတ်းပိုၼ်ႉ၊ မီးလွင်ႈတုမ်ႉတိူဝ်ႉၵၢၼ်ၽုၵ်ႇသွမ်ႈလႄႈ ၸဝ်ႈႁႆႈၸဝ်ႈၼႃးၼႂ်းၸိုင်ႈတႆး။ လွင်ႈသိုၵ်းမၢၼ်ႈမႃး မီးယူႇၼႂ်းပိုၼ်ႉတီႈ၊ ႁူမ်ႈလူၺ်ႈလွင်ႈလူင်ပွင်ၸိုင်ႈၸႄႈမိူင်းဢမ်ႇမီးဢႃႇၼႃႇပွင်ၵၢၼ် တႃႇႁႄႉၵင်ႈပၼ်သုၼ်ႇလႆႈ ၸဝ်ႈႁႆႈၸဝ်ႈၼႃး တီႈလိၼ်ၵူၼ်းမိူင်းလႄႈ ဢမ်ႇမီးလွင်ႈထၢင်ႇႁၢင်ႈၽုၵ်ႇသွမ်ႈလႆႈလွတ်ႈလွတ်ႈလႅဝ်းလႅဝ်းၼၼ်ႉ ပဵၼ်ပၼ်ႁႃယႂ်ႇလူင်ၼႂ်းမိူင်းတႆး။ လိူဝ်သေၼၼ်ႉလွင်ႈ ဢုပ်ႇဢူဝ်းၵိုတ်းယိုဝ်းၵၼ်တင်းၸုမ်းယိပ်းၵွင်ႈၵၢင်ႇဢၼ် မီးၶူင်းၵၢၼ်ပူၵ်းပွင်ၸွမ်းမႃးၼၼ်ႉ သင်ဝႃႈပႆႇၵႄႈလိတ်ႈပၼ်ႁႃၵၢၼ်မိူင်းလႆႈသေ သိုပ်ႇႁဵတ်းသၢင်ႈၵႂႃႇၼႆၸိုင် ယိုင်ႈ ၶႅၼ်းတေၸၢင်ႈ ႁဵတ်းႁႂ်ႈၵူၼ်းမိူင်းလုသုမ်းတီႈလိၼ်ပၼ် မႁႃႇၶူင်းၵၢၼ်လူင် ဢၼ်တေၵေႃႇသၢင်ႈၵႂႃႇတင်း ၼမ် မိူၼ်ၼင်ႇတေႃႈၼမ်ႉမၼ်း/ၵႅတ်ႉသ်၊ ၾၢႆလူင်တႃႇႁဵတ်းဢွၵ်ႇၾႆးၾႃႉ၊ ၵၢၼ်ၶုတ်းႁႄႈလႄႈႁူင်းၵၢၼ်လူင်ၸိူဝ်း ၼၼ်ႉယဝ်ႉ။ လွင်ႈၸိူဝ်းၼႆႉ ၶႅၼ်းတေႁဵတ်းႁႂ်ႈၸဝ်ႈႁႆႈ ၸဝ်ႈၼႃးလႄႈ ပၢႆးၽုၵ်ႇသွမ်ႈၶဝ်လုသုမ်းလိူဝ်ၵဝ်ႇထႅင်ႈ ၵူၺ်း ၼႆ။

လွင်ႈလႆႈပိုၼ်ၽၢဝ်ႇၼႆႉ မီးၶေႃႈတုၵ်းယွၼ်း 4 ၶေႃႈ

1 ပိူင်ငဝ်ႈပိုင်းမိူင်း 2008 ပဵၼ်ပၼ်ႁႃၵိတ်ႇၶွင်ႈတွၼ်ႈတႃႇ ၵႄႈလိတ်ႈပၼ်ႁႃပၢႆးမၢၵ်ႈမီးလႄႈပၼ်ႁႃတူင်ႇဝူင်းၵူၼ်း ၼႂ်းမိူင်းတႆးဢၼ်ပဵၼ်ယူႇယၢမ်းလဵဝ်ၼႆႉ၊ လွင်ႈဢုပ်ႇဢူဝ်းၵႄႈလိတ်ႈ ပၼ်ႁႃတၢင်းၵၢၼ်မိူင်းလူၺ်ႈၸုမ်းပႃႇတီႇ ၵၢၼ်မိူင်း၊ ၸုမ်းယိပ်းၵွင်ႈၵၢင်ႇလႄႈ မူႇၸုမ်း ၵူၼ်းမိူင်းၶဝ်ႈႁူမ်ႈပႃးၸွမ်းၵွၼ်ႇ ၸင်ႇတေၸၢင်ႈၵႄႈလိတ်ႈလႆႈ။

2 တွၼ်ႈတႃႇၵူၼ်းမိူင်းလႄႈ မူႇၸုမ်းၵူၼ်းမိူင်းတေလႆႈဢွၼ်ႁူဝ်ၶဝ်ႈႁူမ်ႈႁဵတ်းသၢင်ႈၼႂ်းၶၵ်ႉတွၼ်ႈလွင်ႈငမ်းယဵၼ် လႄႈ ၵၢၼ်ပူၵ်းပွင်ၼႂ်းၸိုင်ႈတႆးၼၼ်ႉ သိုၵ်းမၢၼ်ႈတေလႆႈ လူတ်းယွမ်းလူင်းႁႅင်းသိုၵ်းလႄႈ တၵ်းတေလႆႈထွၼ် ဢွၵ်ႇၼႂ်းၼႃႈတီႈပၢင် တိုၵ်းၼႂ်း မိူင်းတႆးတင်းသဵင်ႈ။

3 လူင်ပွင်ၸိုင်ႈၼွၵ်ႈမိူင်း ၵူႈမိူင်းမိူင်း ၸိူဝ်းၶႂ်ႈၵမ်ႉထႅမ်လွင်ႈဢုပ်ႇဢူဝ်းလႄႈ လွင်ႈငမ်းယဵၼ်ၼၼ်ႉထုၵ်ႇလီမီး ၼမ်ႉ ၸႂ်ပဵၼ်ၵၢင်၊ ဢမ်ႇထုၵ်ႇလီဢဝ်ငိုၼ်းတွင်းလႄႈ လွင်ႈငမ်းယဵၼ်ပဵၼ် ၼႃႈတိူဝ်ႈသေယူႇၽၢႆႇလူင်ပွင်ၸိုင်ႈ ယဝ်ႉ မႃးမိပ်ႇဢီးႁႂ်ႈၸၢဝ်းၶိူဝ်း ၶဝ်ႈယူႇတႂ်ႈပိူင်ငဝ်ႈပိုင်း မိူင်း 2008။ ငိုၼ်းတွင်းတွၼ်ႈတႃႇၵၢၼ်ပူၵ်းပွင်ၵူၼ်းမိူင်း ၼၼ်ႉ ၵေႃႈ ႁႂ်ႈသူင်ႇထိုင်မိုဝ်း ၵူၼ်းမိူင်းလႄႈ ႁႂ်ႈလႆႈမီးပႃးသုၼ်ႇၶဝ်ႈႁူမ်ႈႁဵတ်းသၢင်ႈပူၵ်းပွင်ၸွမ်း။

4 လူင်ပွင်ၸိုင်ႈလႄႈၸဝ်ႈငိုၼ်းတိုၼ်း ဢၼ်မိူဝ်းလူင်းတိုၼ်းၶူင်းၵၢၼ်၊ မိူၼ်ၼင်ႇတေႃႈ ၵႅတ်ႉသ်၊ တေႃႈၼမ်ႉ မၼ်း၊ ၾၢႆလူင်ႁႅင်းၾႆးၾႃႉ၊ ၶုတ်းႁႄႈၸဵမ်ၸိူဝ်းၼႆႉ ဢၼ်ၸၢင်ႈ ယႃႉလႅဝ်ၶူဝ်းၶွင်သၽႃႇဝ၊ ၵူၼ်းမိူင်းထုၵ်ႇသိမ်း တိူၵ်ႇ ႁႆႈလွၵ်းၼႃး၊ ၵူၼ်းမိူင်းလႆႈတုၵ်ႉၶ ယၢပ်ႇၽိုတ်ႇၶၢၼ်ၸႂ်ၸဵမ်ၸိူဝ်းၼႆႉလႄႈသင်၊ ဢမ်ႇမီးမၢႆမီႈႁႄႉၵင်ႈပၼ် သုၼ်ႇလႆႈၵူၼ်းလႄႈ သၽႃႇဝ ၼမ်ႉလိၼ်ႁိၼ်ၽႃ၊ တိူၵ်ႇႁႆႈ လွၵ်းၼႃး၊ ဢိၵ်ႇပႃးၵူၼ်းမိူင်းဢမ်ႇလႆႈႁပ်ႉႁူႉၸွမ်း ၶူင်း ၵၢၼ်လႄႈ ဢမ်ႇမီးသုၼ်ႇႁူမ်ႈတႅပ်းတတ်း ၸိူဝ်းၼၼ်ႉလႄႈသင် လိူဝ်သေၼၼ်ႉ ဢမ်ႇလႆႈၵႃႈသၢႆႈတႅၼ်း ၸွမ်း ၼင်ႇမၢႆမီႈ၊ ဢမ်ႇလႆႈႁပ်ႉၽွၼ်းလီ ၼိူဝ်ၶူင်းၵၢၼ်ၸိူဝ်းၼႆႉ ၼႆၸိုင် ၵၢၼ်လူင်းတိုၼ်းၸိူဝ်းၼၼ်ႉတိုၼ်းတေ လႆႈၵိုတ်းယိုတ်းတင်းသဵင်ႈ။

မိူဝ်ႈဝၼ်းထိ 4-5/06/2012 ပူၼ်ႉမႃးမူႇၸုမ်းတႆးလၢႆလၢႆမူႇၸုမ်း မိူၼ်ၼင်ႇ၊ ၸုမ်းၼၢင်းယိင်းတႆး၊ ၸုမ်းၵူၼ်းၼုမ်ႇ တႆး၊ ၸုမ်းသိုဝ်ႇၶၢဝ်ႇ၊ ၸုမ်းသိင်ႇဝႅတ်ႉလွမ်ႉတႆး၊ ၸုမ်းၽၢႆႇပၢႆးယူႇလီ၊ ၸုမ်းၽၢႆႇပၢႆး ပိင်ႇၺႃႇ၊ ၸုမ်းၽၢႆႇပူၵ်းပွင်၊ ၸုမ်း ၸဝ်ႈႁႆႈၸဝ်ႈၼႃး၊ ၸုမ်းပူၵ်းပွင်မူႇဝၢၼ်ႈ၊ ၸုမ်းၸဝ်ႈႁႆႈၸဝ်ႈၼႃး မိူင်းတႆး၊ ၸုမ်းသုၼ်ႇလႆႈသုၼ်ႇ ပဵၼ်ၵူၼ်း၊ ၸုမ်း လိၵ်ႈလၢႆးၾိင်ႈငႄႈ၊ ၸုမ်းႁႅင်းၵၢၼ်လႄႈ ၸုမ်းသင်ႇၶႃႇၸဝ်ႈၼႂ်းမိူင်းတႆး လႆႈမီးပၢင်ဢုပ်ႇဢူဝ်းၵဵဝ်ႇလူၺ်ႈလွင်ႈ ၶၵ်ႉ တွၼ်ႈလွင်ႈငမ်းယဵၼ်လႄႈ လွင်ႈပူၵ်းပွင်ၼႂ်းၸိုင်ႈတႆးသေၸင်ႇလႆႈမီးမႃးပၢင် သပ်းလႅင်းၸႅင်ႈၶၢဝ်ႇထႅင်ႈ ၼႂ်း ဝၼ်းထိ 12/06/2012။