ၶၢဝ်ႇမိူင်းတႆး

KNU - ဝၢႆးတူၵ်းလူင်းၵိုတ်းယိုဝ်း ပၢင်သဝ်း သိုၵ်းမၢၼ်ႈၽိူမ်ႉၶိုၼ်ႈၸမ် 300

တေႊဝိတ်ႊ တႃႊၶႃႊပေႃႊ ၵႅမ်ႁူဝ်ပဝ်ႈ ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇလၢတ်ႈဝႃႈ ဝၢႆးတူၵ်းလူင်းၵိုတ်းယိုဝ်းၵၼ် တင်း လူင်ပွင်ၸိုင်မၢၼ်ႈယဝ်ႉ ပၢင်သဝ်းသိုၵ်းမၢၼ်ႈၽိူမ်ႉၶိုၼ်ႈမႃး ၸမ် 300 ၼႆ။

တေႊဝိတ်ႊ တႃႊၶႃႊပေႃႊ ၵႅမ်ႁူဝ်ပဝ်ႈ ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ Karen National Union (KNU) လၢတ်ႈ ၼႂ်းပၢင်ဢုပ်ႇဢူဝ်း ၵဵဝ်ႇလူၺ်ႈလွင်ႈငဝ်းလၢႆးလွင်ႈ လႅၵ်ႈလၢႆႈၼႂ်းမိူင်းႁူမ်ႈ တုမ်မၢၼ်ႈ ဢၼ်ၸတ်းတီႈၸၼ်ႉၸွမ် ၵဵင်းမႆႇ မိူဝ်ႈဝႃး ဝၼ်းထိ 14/06/2012 ဝႃႈ “ ဝၢႆးတူၵ်းလူင်းၵိုတ်းယိုဝ်းၵၼ်တင်းလူင်ပွင်ၸိုင်ႈမၢၼ်ႈမၢၼ်ႈယဝ်ႉ ပၢင် သဝ်း (Camp) သိုၵ်းမၢၼ်ႈၸဵမ်လဵၵ်ႉ ၸဵမ်ယႂ်ႇ ၽိူမ်ႉၶိုၼ်ႈမႃးၼႂ်းပိုၼ်ႉတီႈဢၼ် KNU ၵုမ်းၵမ် ၸမ်မွၵ်ႈ 300 သေ ယင်းပႆႇထွၼ်ၶိုၼ်း” ဝႃႈၼႆ။

သိုပ်ႇလၢတ်ႈဝႃႈ လွင်ႈလႆႈတူၵ်းလူင်းၵိုတ်းယိုဝ်းၵၼ်ၼႆႉ ၵွပ်ႈပိူဝ်ႈငဝ်းလၢႆးလုမ်ႈၾႃႉၵေႃႈမိပ်ႇမႃး တၢင်းၽၢႆႇလူင်ပွင် ၸိုင်ႈမၢၼ်ႈၵေႃႈပိုၼ်ၽၢဝ်ႇယိုၼ်းမိုဝ်းဢုပ်ႇဢူဝ်းသၢင်ႈလွင်ႈ ငမ်းယဵၼ်ပႃး လႄႈၸင်ႇလႆႈဢုပ်ႇဢူဝ်းၵိုတ်းယိုဝ်း။ ႁဝ်းၶႃႈၶဝ်ႈပွႆးတိုၵ်းၼႆႉဢမ်ႇၸႂ်ႈတႃႇတိုၵ်းပီႈၼွင်ႉ ၸၢဝ်းမၢၼ်ႈ ႁဝ်းၶႃႈတိုၵ်း ၸဝ်ႈဢႃႇၼႃႇ (ဢၢမ်းၼၢတ်ႈ) မၢၼ်ႈ ၵူၺ်း။ ပၼ်ႁႃၵၢၼ်မိူင်းတၵ်းလႆႈ ၵႄႈလိတ်ႈလူၺ်ႈလၢႆး ၸိုၼ်ႈသႂ် ၸႅတ်ႈၸၢင်ႇ၊ ဢၼ်ၸၢဝ်းၶိူဝ်းၶႂ်ႈလႆႈၼႆႉပဵၼ် ၵၢၼ် မိူင်း ဢွၼ်တၢင်း ဢမ်ႇၸႂ်ႈၵၢၼ်ပူၵ်း ပွင်ဢွၼ်တၢင်း။ ၵွပ်ႈဝႃႈၵၢၼ်ပူၵ်းပွင်ၼႆႉမၼ်းၸၢင်ႈယႃႉလု သၽႃႇဝ ၶူဝ်းၶွင်ၼိူဝ်လိၼ် တႂ်ႈလိၼ်ႁဝ်း။  ပိူင်ငဝ်ႈပိုင်းမိူင်းမၢၼ်ႈ 2008 ၵေႃႈတၵ်းလႆႈၶိုၼ်း မူၼ်ႉမေး ၵႄႈလိတ်ႈ။

ႁဝ်းၶႃႈၶႂ်ႈလႆႈၸိုင်ႈမိူင်းႁူမ်ႈတုမ် တီႊမူဝ်ႊၶရေႊသီႊ ၸႅတ်ႈၸၢင်ႇၵူၺ်း။ ႁဝ်းၶႃႈၵမ်ႉထႅမ် ၼၢင်း ဢွင်ႇသၢၼ်းသုၵျီႇ တွၼ်ႈတႃႇတီႊမူဝ်ႊၶရေႊသီႊ၊ မူၼ်ႉမႄးၶိုၼ်းပိူင်ငဝ်ႈပိုင်းမိူင်း 2008 လႄႈပိူင်ၽွင်းငမ်းၸဵမ်ၸိူဝ်းၼႆႉၼၼ်ႉယူႇ ၼႆယဝ်ႉ။

မိူဝ်ႈၽူႈသိုဝ်ႇၶၢဝ်ႇထၢမ်ဝႃႈ ဝၢႆးသေတူၵ်းလူင်းၵိုတ်းယိုဝ်းၵၼ်ယဝ်ႉ ၸွင်ႇမီးၵၢၼ်ႁၢင်ႈႁႅၼ်းတိုၵ်းတေႃးၶိုၼ်းၼႆ ၼၼ်ႉ မၼ်းၸဝ်ႈတွပ်ႇဝႃႈ သင်ဝႃႈလွင်ႈဢုပ်ႇဢူဝ်းၵိုတ်းယိုဝ်းၼႆႉ ဢမ်ႇယိုၼ်းယၢဝ်းၸိုင်ႁူႉၵႃႈတၵ်းလႆႈႁၢင်ႈႁႅၼ်း ၶဝ်ႈပၢင်တိုၵ်းၶိုၼ်း၊ မိူဝ်ႈလဵဝ်ႁဝ်းၶဝ် ဢုပ်ႇၵၼ်ၵဵဝ်ႇလူၺ်ႈလွင်ႈ လွၵ်းပိူင်ၸိုင်ႈမိူင်းႁူမ်ႈတုမ်ၸႅတ်ႈၸၢင်ႇ လႄႈလွင်ႈ တီႊ မူဝ်ႊၶရေႊသီႊ ၼႂ်းမိူင်းႁူမ်ႈတုမ်မၢၼ်ႈယူႇ ၼႆယဝ်ႉ။

ဢႃးၸၢၼ်ၶိုၼ်းသႂ် ႁူဝ်ၼႃႈၸုမ်းၶၢဝ်ႇၽူႈတွႆႇႁွၵ်ႈ ၵွၼ်းၶေႃၵေႃႈဢုပ်ႇဢူဝ်းလၢတ်ႈၼႄဝႃႈလွင်ႈဢုပ်ႇဢူဝ်းၵိုတ်း ယိုဝ်း ၵၼ်ၼႆႉ ၵူၼ်းၼွၵ်ႈမိူင်းၶဝ်တႄႉ တေၶဝ်ႈၸႂ်ဝႃႈ ၵတ်းယဵၼ်ယဝ်ႉ၊ ဢမ်ႇတိုၵ်းယိုဝ်းၵၼ်ယဝ်ႉၼႆယူႇ။ၵူၺ်းၵႃႈ ပႆႇၸႂ်ႈၸိူင်ႉၼၼ် ယင်းပႆႇထိုင်ၶၵ်ႉတွၼ်ႈငမ်းယဵၼ်တေႉတေႉ ၵွပ်ႈဝႃႈၵိုတ်းယိုဝ်းၵၼ်ယဝ်ႉၵေႃႈတိုၵ်ႉမီးပၢင်တိုၵ်း ၵၼ်ယူႇ (သိုၵ်းမၢၼ်ႈၶိုၼ်း ယိုဝ်းဢွၼ်တၢင်း)။ ဢၼ်ဢုပ်ႇဢူဝ်းၵိုတ်းယိုဝ်းၵၼ်မိူဝ်ႈလဵဝ်ၼႆႉၵေႃႈ မိူၼ်တင်းၵူႈမၢဝ်ႇ သၢဝ် တိုၵ်ႉၸိပ်ႇ တိုၵ်ႉမဝ်းႁၵ်ႉၵၼ်သေပႆႇလႆႈလူင်းလၢႆးမိုဝ်းၵူပ်ႉၵူႈ ၵိၼ်ၶႅၵ်ႇ ပဵၼ်ႁေႃပဵၼ်ႁိူၼ်းႁူမ်ႈၵၼ်တိူဝ်ႈ ၼၼ်ႉ ၵူၺ်း။ ပဵၵ်ႉသမ်ႉမိူင်းမၢၼ်ႈမီးလွင်ႈလႅၵ်ႈလၢႆႈ ၵမ်ႈၽွင်ႈသေတႃႉ ဢမ်ႇမီးၽႂ် လၢတ်ႈလႆႈဝႃႈမၢၼ်ႈတေဢမ်ႇ ၶိုၼ်ၶိုၼ်းတၢင်းၵဝ်ႇ( ပွၵ်ႈၶိုၼ်းမိူၼ် ပိူင်သိုၵ်းဢုပ်ႉပိူင်ႇၵဝ်ႇ)၊ မၢၼ်ႈတေဢမ်ႇႁုပ်ႈယိုတ်း ဢႃႇၼႃႇ (ဢၢမ်းၼၢတ်ႈ) ၸိုင်ႈမိူင်းၶိုၼ်း ၼႆၵေႃႈ ၽႂ်ဢမ်ႇႁတ်း လၢတ်ႈလႆႈ။ ၵွပ်ႈၼၼ်ၶႂ်ႈတုၵ်းယွၼ်းထိုင် UN လႄႈUS မိူင်းဝၼ်းတူၵ်း ၶဝ် ႁႂ်ႈၾၢင်ႉၵႅမ်း ၵဵဝ်ႇလူၺ်ႈလွင်ႈတေယုၵ်ႉပႅတ်ႈ ၵၢၼ်ႁႅတ်ႉပၢႆးမၢၵ်ႈမီး ၼိူဝ်မိူင်းမၢၼ်ႈၼၼ်ႉယူႇ ၼႆယဝ်ႉ။

ၼွၵ်ႈသေၼၼ်ႉ ယိင်းႁၢၼ်ၾႃႉ ၸုမ်းၵပ်းသၢၼ်လွင်ႈၼၢင်းယိင်းတႆးၵေႃႈလႆႈဢုပ်ႇဢူဝ်းပႃး ႁူဝ်ၶေႃႈလွင်ႈမူႇၸုမ်း ၵူၼ်းမိူင်းတႆးႁူမ်ႈၵၼ်ပိုၼ်ၽၢဝ်ႇ ငဝ်းလၢႆး ၵၢၼ်မိူင်းလႄႈ ၶၵ်ႉတွၼ်ႈ လွင်ႈငမ်း ယဵၼ် ၼႂ်းၸိုင်ႈတႆးဢၼ်ၸုမ်း တႆးႁူမ်ႈၵၼ်ၸတ်းပၢင်သပ်းလႅင်းၸႅင်ႈၶၢဝ်ႇ မိူဝ်ႈဝၼ်းထိ12/06/2012 ပူၼ်ႉမႃးၼၼ်ႉယူႇ။