ၶၢဝ်ႇမိူင်းတႆး

တႃႇၵႄႈလိတ်ႈပၼ်ႁႃယႃႈမဝ်းၵမ် တၵ်းလႆႈၵႄႈၶႆပၼ်ႁႃၵၢၼ်မိူင်း

ဢႃးၸၢၼ်ၶိုၼ်းသႂ် ၸႂ်ယဵၼ် ႁူဝ်ၼႃႈၸုမ်းပၵ်းတႃယႃႈမဝ်းၵမ်ၼႂ်းၸိုင်ႈတႆး လၢတ်ႈသပ်းလႅင်း ၸႅင်ႈၶၢဝ်ႇၼႂ်းဝၼ်း သၢၼ် ၶတ်းယႃႈမဝ်းၵမ် ၸၢတ်ႈၸိုင်ႈလုမ်ႈၾႃႉ International Day Against Drug Abuse and Illicit Trafficking ဝႃႈတႃႇၵႄႈလိတ်ႈပၼ်ႁႃႈယႃႈမဝ်းၵမ် တၵ်းလႆႈ ၵႄႈၶႆပၼ် ႁႃၵၢၼ်မိူင်း ၼႆ။

မိူဝ်ႈၼႆႉဝၼ်းထိ 26/06/2012 ဝၼ်းသၢၼ်ၶတ်းယႃႈမဝ်းၵမ်ၸၢတ်ႈၸိုင်ႈလုမ်ႈၾႃႉ International Day Against
Drug Abuse and Illicit Trafficking ၼႆႉယူႇတီႈၸုမ်းပၵ်းတႃ ယႃႈမဝ်းၵမ်ၼႂ်းၸိုင်ႈတႆး တင်းၸုမ်းၵူၼ်းၼုမ်ႇ
ပဢူဝ်းလႆႈႁူမ်ႈၵၼ်ၸတ်းပၢင်သပ်းလႅင်းၸႅင်ႇၶၢဝ်ႇ  ၵဵဝ်ႇလူၺ်ႈယႃႈ မဝ်းၵမ် ၼႂ်းၵဵင်းမႆႇ လိၼ်ထႆးတီႈၼိုင်ႈ၊ မီးၽူႈ
သိုဝ်ႇၶၢဝ်ႇတႆး ထႆး မၢၼ်ႈ လႄႈၵူၼ်းၼွၵ်ႈမိူင်း ၶဝ်ႈႁူမ်ႈ။

ဢႃးၸၢၼ်ၶိုၼ်းသႂ် ၸႂ်ယဵၼ်ႁူဝ်ၼႃႈၸုမ်းၵေႃၶၢဝ်ႇၽူႈတွႆႇႁွၵ်ႈ မိူင်းလွႆ လႄႈႁူဝ်ၼႃႈၸုမ်းပၵ်းတႃယႃႈမဝ်းၵမ်ၼႂ်း
ၸိုင်ႈ တႆး လၢတ်ႈဝႃႈ“ တႃႇၵႄႈလိတ်ႈပၼ်ႁႃယႃႈမဝ်းၵမ် ၼႂ်းမိူင်းႁူမ်ႈတုမ် မၢၼ်ႈတၵ်းလႆႈၵႄႈၶႆပၼ်ႁႃၵၢၼ်မိူင်း။
ပေႃး မီးၶေႃႈတူၵ်းၵၼ်တၢင်းၵၢၼ်မိူင်း ယဝ်ႉၵွၼ်ႇၸင်ႇၸၢင်ႈၵႄႈလိတ်ႈပၼ်ႁႃ ယႃႈမဝ်းၵမ်လႆႈၵွပ်ႈဝႃႈမၼ်းၵွင်ႉၵၢႆႇ
ၵၼ်တၢင်းၵၢၼ်မိူင်း” ၼႆ။

သိုပ်ႇလၢတ်ႈဝႃႈ ပေႃးလႆႈၶေႃႈတူၵ်းလူင်းၵၼ်တၢင်းၵၢၼ်မိူင်းယဝ်ႉၸိုင် တေဢမ်ႇမီးၽူႈၶဵၼ်တႃႇတေတေႃႇသူႈတိုၵ်း
တေႃးၵၼ်ယဝ်ႉ၊ ၵွပ်ႈၼၼ်လႄႈဢဵၼ်ႁႅင်းသိုၵ်းမၢၼ်ႈၵေႃႈဢမ်ႇ တၢပ်ႈၽိူမ်ႉ ထႅမ်ထႅင်ႈယဝ်ႉ မီးတႃႇလူဝ်ႇလူတ်း
လူင်း ၵူၺ်း။ ပေႃႈလဵင်ႉၵူၼ်းၵႃႉမၼ်းၵေႃႈ တေဢမ်ႇမီးတိုဝ်ႉတၢင်းယဝ်ႉ။ ၵူၼ်းမိူင်းၵေႃႈတေလႆႈထၢင်ႇႁၢင်ႈလူမ်ၸႂ်
ၼႂ်းၵၢၼ်ႁႃလဵင်ႉ တွင်ႉယဝ်ႉ။ ပေႃးၼၼ် ပၼ်ႁႃယႃႈမဝ်းၵမ်ၵေႃႈတေလူတ်းလူင်းၵႂႃႇႁင်းမၼ်း။ သင်ပႆႇမီးၶေႃႈတူၵ်း
လူင်းၵၼ်တၢင်း ၵၢၼ်မိူင်းသေ သမ်ႉၶိုင်ယူႇလၢႆးၵဝ်ႇလၢႆးလဵဝ်ၵူၺ်းၸိုင် ဢမ်ႇမီးတၢင်း တႃႇႁႂ်ႈယႃႈမဝ်းၵမ်မူၺ်ႉဝၢႆးႁၢႆ
လႆႈ။ ပေႃးတူၺ်းပႃႈလင်ပူၼ်ႉမႃးၸိုင် မၢၼ်ႈဢမ်ႇမီးၽႅၼ်ၶႂ်ႈၽဵဝ်ႈ မူၺ်ႉယႃႈမဝ်းၵမ်သုတ်းဝၢႆးတေႉတေႉ။ မၼ်းၶႂ်ႈ
ၽဵဝ်ႈမူၺ်ႉ ၸုမ်းယိပ်းၵွင်ႈၵၢင်ႇဢၼ်တေႃႇသူႈ မၼ်းၵူၺ်း။ ၵွပ်ႈၼၼ်လႄႈ ၸုမ်းယိပ်းၵွင်ႈၵၢင်ႇ(ၸုမ်းၵိုတ်းသိုၵ်း၊
ၸုမ်းပျီႇတုၸိတ်ႉ) ၸုမ်းလႂ် ၽႂ်ၸွမ်းၽႅၼ်ၵၢၼ်မၼ်း ၸွႆႈထႅမ်မၼ်းၵေႃႈ မၼ်းပၼ်လွင်ႈထၢင်ႇႁၢင်ႈ ၽုၵ်ႇႁဵတ်းယႃႈ
မဝ်းၵမ် တဵမ်တဵမ်ထူၼ်ႈထူၼ်ႈ၊ ၽႂ်ၸုမ်းလႂ် သၢၼ်ၶတ်းမၼ်း ဢမ်ႇၸွမ်းၽႅၼ်မၼ်းၵေႃႈမၼ်းၶႂ်ႈမင် ၸုမ်းၼၼ်ႉ
ၵွႆၵူၺ်း ၼႆယဝ်ႉ။

ၼွၵ်ႈသေၼႆႉၼႂ်းဝၼ်းသၢၼ်ၶတ်းယႃႈမဝ်းၵမ်လုမ်ႈၾႃႉ 26/06/2012 ၼႆႉ ယူႇတီႈၶွင်ႇသီႇ ဢဝ်ၶိုၼ်း ၸိုင်ႈတႆး/
တပ်ႉ သိုၵ်းၸိုင်ႈတႆး လွႆတႆးလႅင်ၵေႃႈဢွၵ်ႇၶေႃႈပိုၼ်ၽၢဝ်ႇၸူမ်းသိူဝ်း တႃႇႁူမ်ႈမိုဝ်း ၵူႈမိူင်းမိူင်းလႄႈ ၵူႈမူႇၵူႈၸုမ်းၼႂ်း
ၸိုင်ႈမိူင်း ၽဵဝ်ႈယႃႈမဝ်းၵမ်ၵႂႃႇ။

ၼႂ်းလိၵ်ႈပိုၼ်ၽၢဝ်ႇလၢတ်ႈပႃးလွင်ႈၶွင်ႇသီႇဢဝ်ၶိုၼ်းၸိုင်ႈတႆး မီးပေႃႇလသီႇ ၽဵဝ်ႈယႃႈမဝ်းၵမ်။ ၼႂ်းပီ 2011 လႄႈ
2012 ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး သိမ်း လႆႈႁူင်းႁုင်တူမ်ႈယႃႈၽိၼ်ႇ 1 ႁူင်း ႁူမ်ႈပႃး
သၢၼ်ၶေႊမီႊ လႄႈယႃႈႁေႊလူဝ်ႊဢိၼ်ႊ၊ ယႃႈၽိၼ်ႇ၊ ၶိူင်ႈႁုင်တင်းၼမ်။ ၼွၵ်ႈသေၼၼ်ႉတိလႆႈၵူၼ်းၶၢႆယႃႈယွႆႈ
ပၼ်ၵူၼ်းမိူင်း 80 ၵေႃႉ။ လႆႈတတ်းယႃႈပၼ်ၵူၼ်းသူႇယႃႈ 189 ၵေႃႉ ၸဵမ်ၸိူဝ်းၼႆႉၵႂႃႇ။

တင်ႈတႄႇလႆႈတူၵ်းလူင်းၵိုတ်းယိုဝ်းၵၼ်တင်းလူင်ပွင်ၸိုင်ႈမၢၼ်ႈ မိူဝ်ႈဝၼ်းထိ 02/11/2011 မႃး ၼႂ်းဝၼ်းထိ
19/05/2012 မိူဝ်ႈဢုပ်ႇဢူဝ်းၵၼ်ၸၼ်ႉၸိုင်ႈမိူင်း ႁူမ်ႈတုမ်ပွၵ်ႈၵမ်း (2) တီႈၵဵင်းတုင်ၼၼ်ႉၵေႃႈ ၶွင်ႇသီႇဢဝ်ၶိုၼ်း
ၸိုင်ႈတႆး ဝႆႉႁူဝ်ၶေႃႈယႃႈမဝ်း ၵမ်လမ်ႇလွင်ႈသေ ဢုပ်ႇဢူဝ်းတင်းလူင်ပွင်ၸိုင်ႈမၢၼ်ႈမႃးၼႆယဝ်ႉ။