ၶၢဝ်ႇမိူင်းတႆး

ႁူဝ်ပဝ်ႈငဝ်ႈငုၼ်းတီႊမူဝ်ႊၶရေႊသီႊ ၸိူဝ်ႉၶိူဝ်းတႆးႁွတ်ႈထိုင်မိူင်းၵွၵ်ႇ

ၶုၼ်ထုၼ်းဢူး ႁူဝ်ပဝ်ႈငဝ်ႈငုၼ်းတီႊမူဝ်ႊၶရေႊသီႊ ၸိူဝ်ႉၶိူဝ်းတႆးဢၼ်ဢွၵ်ႇၶၢဝ်းတၢင်းပိူဝ်ႈတႃႇယူတ်းယႃတၢင်း ပဵၼ် ႁွတ်ႈထိုင်မိူင်းၵွၵ်ႇ ဝၼ်းထိ 02/07/2012 ပီႈၼွင်ႉတႆးၼႂ်းမိူင်းၵွၵ်ႇဢွၼ်ၵၼ် ႁပ်ႉတွၼ်ႈၸမ်ပၢၵ်ႇ။

ၶုၼ်ထုၼ်းဢူး ႁူဝ်ပဝ်ႈငဝ်ႈငုၼ်းတီႊမူဝ်ႊၶရေႊသီႊ ၸိူဝ်ႉၶိူဝ်းတႆး Shan Nationalities League for Democracy (SNLD) ဢၼ်ဢွၵ်ႇၶၢဝ်းတၢင်းလုၵ်ႉမိူင်းႁူမ်ႈတုမ် မိူဝ်ႈၶၢဝ်းယၢမ်း 09:40 (ၶၢဝ်းယၢမ်းမိူင်းႁူမ်ႈတုမ် မၢၼ်ႈ) ပိူဝ်ႈတႃႇ ယူတ်းယႃတၢင်းပဵၼ် ႁွတ်ႈထိုင်မိူင်းၵွၵ်ႇ မိူဝ်ႈၶၢဝ်းယၢမ်း 22:45 (10:45) ဝၼ်းထိ 02/07/2012 ပီႈၼွင်ႉတႆးၼႂ်းမိူင်းၵွၵ်ႇ၊ ၸဵမ်ၵူၼ်းႁႅင်းၵၢၼ်၊ ၵူၼ်းၼုမ်ႇ လႄႈလုၵ်ႈႁဵၼ်းၸၼ်ႉၸွမ်ဢွၼ်ၵၼ်ႁပ်ႉတွၼ်ႈၸမ် ပၢၵ်ႇ။

ၼၢင်းယိင်းၼုမ်ႇၽူႈပႂ်ႉႁပ်ႉတွၼ်ႈၵေႃႉၼိုင်ႈလၢတ်ႈဝႃႈ “ ငိၼ်းၸူမ်းသိူဝ်းတေႉယဝ်ႉတီႈလႆႈႁၼ် လုင်းၶုၼ်ထုၼ်း ဢူး ၵူၼ်းလူင်တႆးၵေႃႉၼိုင်ႈထႅင်ႈပွၵ်ႈၼႆႉ။ ၶႃႈယၢမ်ႈလႆႈႁၼ်မၼ်းၸဝ်ႈပွၵ်ႈၼိုင်ႈ မိူဝ်ႈၼႃႈမၼ်းၸဝ်ႈတေတူၵ်း ၶွၵ်ႈ” ဝႃႈၼႆ။

ၸၢႆးၸိင်ႇဝုၼ်း ဢၼ်ႁဵတ်းၵၢၼ်ယူႇၼႂ်းမိူင်းၵွၵ်ႇလၢတ်ႈဝႃႈ ႁဝ်းပဵၼ်တႆးၵေႃႉၼိုင်ႈ၊ ပဵၵ်ႉသမ်ႉႁဝ်းဢမ်ႇလႆႈႁဵတ်း ၵၢၼ်ဝၢၼ်ႈ ၵၢၼ်မိူင်းသေတႃႉၵေႃႈ ဢၼ်လႆႈမႃးၶဝ်ႈႁူမ်ႈၸုမ်းတႆးၸိူဝ်းမႃးႁပ်ႉ ၽူႈၼမ်းတႆးႁဝ်းၼႆႉပဵၼ်ဢၼ် လီသိူဝ်းၸႂ်တေႉ ၼႆ။

ၸၢႆးထီး ၵူၼ်းၼုမ်ႇၽူႈၶဝ်ႈႁူမ်ႈပႂ်ႉႁပ်ႉတွၼ်ႈလၢတ်ႈဝႃႈ “ႁဵတ်းႁႂ်ႈၵူၼ်းထႆး၊ ၵူၼ်းၼွၵ်ႈမိူင်း(ၾရင်ႇ) ၶဝ်ႁူႉၸၵ်းႁဝ်း မႃးထႅင်ႈ လွင်ႈဝႃႈတႆးႁဝ်းၵေႃႈႁၵ်ႉၵၼ်ယူႇ။ ပဵၵ်ႉသမ်ႉႁဝ်းၽၢတ်ႇဝၢၼ်ႈယၢၼ်မိူင်း မႃးသေတႃႉ ပေႃးၽူႈယႂ်ႇၵူၼ်း လူင်ႁဝ်းမႃး တိုၼ်းပႂ်ႉႁပ်ႉတွၼ်ႈ ႁၵ်ႉၵၼ်ယူႇ” ဝႃႈၼႆ။

ၶုၼ်ထုၼ်းဢူး ႁူဝ်ပဝ်ႈငဝ်ႈငုၼ်းတီႊမူဝ်ၶရေႊသီႊ ၸိူဝ်ႉၶိူဝ်းတႆး/ ပႃႇတီႇ ႁူဝ်သိူဝ် ၼႆႉမီးတၢင်းပဵၼ် ၸဵပ်းမူၺ်ႈ၊ လုပ်ႈၵပ်းလုပ်ႇတေႃႇ၊ ယဵဝ်ႈဝၢၼ်၊ တွမ်ႇႁူင်းယဵဝ်ႈၸဵပ်းၸဵမ်ၸိူဝ်းၼႆႉသေၶဝ်ႈယူတ်းယႃ တၢင်းပဵၼ်ၼႂ်းၸိုင်ႈထႆးၼႆ ယဝ်ႉ။

ၶုၼ်ထုၼ်းဢူး ပဵၼ်ႁူဝ်ပဝ်ႈငဝ်ႈငုၼ်းတီႊမူဝ်ႊၶရေႊသီႊ ၸိူဝ်ႉၶိူဝ်းတႆး/ပႃႇတီႇႁူဝ်သိူဝ် (SNLD) ဢၼ်ပႄႉလိူၵ်ႈ တင်ႈ 1990 ၼႂ်းၸိုင်ႈတႆးပတ်းပိုၼ်ႉထိ 1။ ထိ 2 ၼႂ်းၸိုင်ႈမိူင်းႁူမ်ႈတုမ်မၢၼ်ႈပတ်းပိုၼ်ႉ တၢမ်းၸွမ်းပႃႇတီႇ ၼူၵ်ႉယုင်း(NLD) ၼၢင်းဢွင်ႇသၢၼ်းသုၵျီႇ။ ၶုၼ်ထုၼ်းဢူး လႄႈၽူႈၼမ်းတႆး လၢႆၸဝ်ႈလႆႈထုၵ်ႇလူင်ပွင်ၸိုင်ႈၸုမ်းသိုၵ်း မၢၼ်ႈ ၼဢၽ မၢပ်ႇၼေးဝႃႈၶွတ်ႇၽွတ်ႈၸုမ်း ၼွၵ်ႈမၢႆမီႈ၊ ၶိုင်ယႃႉၵဝ်းၸိုင်ႈမိူင်းႁူမ်ႈတုမ်ၼႆသေ ပၼ်တၢမ်ႇၶွၵ်ႈ ပီယၢဝ်းၶၢဝ်းႁိုင် မိူဝ်ႈ 2005၊ ၶုၼ်ထုၼ်းဢူး ၺႃးတၢမ်ႇၶွၵ်ႈ 93 ပီ ။ မၼ်းၸဝ်ႈပူၼ်ႉဢွၵ်ႇၶွၵ်ႈမိူဝ်ႈဝၼ်းထိ 13/႐1/2012  လူၺ်ႈလွင်ႈပူတ်းဝၢင်း ပွႆႇၽႃႈ ဢၼ်ၸွမ်ၸိုင်ႈဢူးတဵင်းသဵင်ႇ ပိုၼ်ၽၢဝ်ႇ။ ပႃႇတီႇ ႁူဝ်သိူဝ်ၶိုၼ်းႁၢင်ႈ ႁႅၼ်းတႃႇၶဝ်ႈ ႁူမ်ႈလိူၵ်ႈတင်ႈ 2015 ဢၼ်တေမႃးထိုင်။