ၶၢဝ်ႇမိူင်းတႆး

ၶူးသွၼ်မၢၼ်ႈပေႃႉႁႅမ်လုၵ်ႈႁဵၼ်း

ၶူးသွၼ်ႁူင်းႁဵၼ်းလိၵ်ႈမၢၼ်ႈၵဵင်းတွင်းပေႃႉထုပ်ႉလုၵ်ႈႁဵၼ်းတႆး ႁၢဝ်ႉႁႅင်း ဢမ်ႇသွၼ်ပၼ်လီလီ။

ၶူးသွၼ် မေႃသွၼ်ႁူင်းႁဵၼ်းလိၵ်ႈမၢၼ်ႈ တီႈဝၢၼ်ႈပၢင်ႇၵျွင်း ၵဵင်းတွင်းၸိုင်ႈတႆး ပွတ်းၸၢၼ်း၊ မီးၶူးသွၼ် မေႃသွၼ် 6 ၵေႃႉတႃႇၵေႃႉၼိုင်ႈပေႃႉႁႅမ်လုၵ်ႈႁဵၼ်းတိၵ်းတိၵ်း၊ လုၵ်ႈႁဵၼ်းမၢင်ၸိူဝ်းႁူဝ်ပူမ်၊ လင်မၢၼ်ႉသေႁဵတ်းႁႂ်ႈလုၵ်ႈဢွၼ်ႇ ၶၢတ်ႇႁူင်းႁဵၼ်းၼႆယဝ်ႉ။

မိူဝ်ႈၵူၼ်းဝၢၼ်ႈၵႂႃႇတၢင်ႇလၢတ်ႈတီႈလုင်းၵၢင်ႉလုင်းႁဵင်ၶဝ်ဝႃႈ ၶူးသွၼ်ၵေႃႉၼႆႉဢမ်ႇ ဢဝ်ယဝ်ႉႁႂ်ႈဢဝ်လုၵ်ႈဢွၼ်ႇ ၸိူဝ်းႁဵၼ်းယဝ်ႉၸၼ်ႉ 10 ၼႂ်းဝၢၼ်ႈၶဝ်ႈပုတ်ႈ။ ၵူၺ်းၵႃႈ မိူဝ်ႈလုၵ်ႈႁဵၼ်းယဝ်ႉၸၼ်ႉသိပ်းၶဝ်ၶဝ်ႈပုတ်ႈၼၼ်ႉလႆႈ ထုၵ်ႇၽူႈၵုမ်းႁူင်းႁဵၼ်းမၢၼ်ႈ ဢမ်ႇပၼ်ၼႃႈလီၶူးတႆးသေတၼ်းလႆႈသွၼ်မွၵ်ႈ 4-5 ဝၼ်းၵူၺ်း ယူႇဢမ်ႇၶၢမ်ႇလႆႈ လႄႈ လႆႈဢွၵ်ႇပႅတ်ႈ ၶိုၼ်းၵႂႃႇဢဝ်မေႃသွၼ်ၸၢဝ်းမၢၼ်ႈမႃးပုတ်ႈၶိုၼ်းၼႆ။

ၵူၼ်းၼႂ်းဝၢၼ်ႈလၢတ်ႈဝႃႈ “ၶူးမၢၼ်ႈၶဝ်ဢမ်ႇၶႂ်ႈပၼ်ပိူၼ်ႈသွၼ်၊ ၶဝ်ၶႂ်ႈႁႂ်ႈမီးမၢၼ်ႈ ၶဝ် ၵူၺ်း၊ၶဝ်ၵူဝ်ပိူၼ်ႈပႄႉပုၼ်ႈ ၶဝ်” ဝႃႈၼႆ။

ၵူၼ်းဝၢၼ်ႈဢုပ်ႇၵုမ်ၵၼ်ဝႃႈ ၶႂ်ႈႁႂ်ႈၽူႈၵုမ်းႁူင်းႁဵၼ်းသြႃႇမလူင်ၼႆႉၶၢႆႉပုတ်ႈသေ ၶႂ်ႈႁႂ်ႈ ၵူၼ်းမႂ်ႇ မႃးတႅၼ်း၊ ၵွပ်ႈဝႃႈ ပေႃးပဵၼ်လုၵ်ႈဢွၼ်ႇတႆးမၼ်းပၼ်လုၵ်ႈၼွင်ႉမၼ်း ႁဵတ်း ၵႃႈဝႃႈၵႃႈပဵၼ်၊ ၶႂ်ႈတွႆႇၸိူင်ႉႁိုဝ်တွႆႇ ၶႂ်ႈပေႃႉၸိူင်ႉႁိုဝ်ပေႃႉ မၼ်းဢမ်ႇသူၼ်ၸႂ်၊ ၵွပ်ႈၼၼ် တေလႆႈၵႂႃႇတၢင်ႇထိုင်တီႈလႂ်ယင်းပႆႇႁူႉ၊ ၵူဝ်ၵေႃႈတိုၵ်ႉလႆႈၵူဝ်၊ ၵွပ်ႈဝႃႈပႆႇမီးတီႈၸႂ် ယႂ်ႇ ၸုမ်းၼၼ်ႉၸုမ်းၼႆႉတေၸွႆႈ ဝႃႈၼႆ။

ႁူင်းႁဵၼ်းၼႆႉပေႃႉႁႅမ်လုၵ်ႈဢွၼ်ႇၼႃႇထိုင်တီႈႁူဝ်ပေႃးၵႂ်ႈ၊ လင်ပေႃးမၢၼ်ႉ၊ ႁႅမ်တေႉ ႁႅမ်ဝႃႈ။ လုၵ်ႈႁဵၼ်းလႆႈလိၵ်ႈ ဢမ်ႇလႆႈလိၵ်ႈၵေႃႈဢဝ်ၶိုၼ်ႈၸၼ်ႉတိၵ်းတိၵ်း၊ မၢင်ၸိူဝ်း ထိုင်ၸၼ်ႉ 5-6 ၵေႃႈယင်းဢမ်ႇမေႃဢၢၼ်ႇမေႃတႅမ်ႈ လိၵ်ႈ ၵေႃႈမီး၊ ပေႃးပဵၼ်မၢၼ်ႈ တႄႉဢမ်ႇဢဝ်မႃးပွႆႇႁူင်းႁဵၼ်းတီႈၼႆႈ ၵွပ်ႈၶဝ်ႁူႉဝႃႈ ႁူင်းႁဵၼ်းလင် ၼႆႉဢမ်ႇမေႃ သွၼ် လိၵ်ႈပၼ်လုၵ်ႈဢွၼ်ႇလီလီ ဝႃႈၼႆ။